Zinarê Xamo

Mirin tahl e

Heyf û mixabin, vîrusa koronayê do lawê seydayê Cegerxwîn ê mezin Keyo Cegexwîn ji nava me bir.

Bi vê xebera reş û wefata ji nişka ve ez pir xemgîn bûm. Bira serê malbatê û hezkiriyên wê sax be. Xwedê sebrê bide zarok û malbata wî.
Gorra wî behişt be.

Her kes zane mirin heye û rojekê ewê dor were wî, wê û dost û hevalên wî jî.
Lê dîsa jî mirina hevalê meriv, dostê meriv bi meriv pir zor û giran tê, meriv nikane qebûl bike.

Mirn kînga were jî tahl e, ne xweş e, meriv dilteng dike.
Mirina Keyo Cegerxwîn bi nexweşiya koronayê ez gelkî êşandim, xemgîn kirim.
Min nebihîstibû nexweş e.

Ji xew şiyar bûm,
qêrîn û halan
Gurmîn û nalîn,
kuştin û talan
Min go: çi bûye, çi ye ev bazdan?
Dengek hate min, dengê perîşan
Dijmin, dijmin..
Dijmin kete Kurdistan…
///Cegerxwîn

XXX
Di tarîxa dinyayê, miletan û şexsan da hin sal û rojên bêyom, qebîh hene. Rojên reş in, dil û hinav li meriv tînin xwar, meriv pir xemgîn dikin. Di wan rojan da meriv ken û dilşadiyê ji bîr dike.
Nebxêra sala du bîstan(2020)jî yek ji van salên bêyom û qebîh e. Wek konekî reş girtiye ser seranserê dinyayê.
Tu carî, di tu tarîxê da nexweşiyekê bi vê mezinahiyê dinya nedaye ber xwe û însan jî tu carî ji ber nexweşiyekê hewqasî bêçare nemane.
Min nedixwest dîsa qala vê nexweşiya pîs bikim, lê mijara dinyayê ya sereke ev e, emê mirinan çawa kêm bikin…

WÊREKIYA CAHILIYÊ

Heta çendakî berê jî tirk û hinek kurdên me jî li hemberî vîrusa koronayê pir xemsar bûn, pir cesûr xuya dikirin, henekê xwe bi koronayê dikirin, digotirn qedera meriv çi be ew e, her tişt di destê Xwedê da ye, filan û bîvan…

Gelek kesên nezan, dîndar û meleyên cahil bi hin gotin û xurafeyên beradayî milet ji ser rê da dixistin, dibûn sebebê însan xwe neparêzin.

Nezanî, cehalet meriv xemsar û cesûr dike. Gava însa nizane ewê çi were serî natirse, bêtir wêrek dibe. Yanî wêrekiya nezaniyê jî heye.

Lê heger meriv mirina xwe nexwaze li hemberî nexweşiyeke, şewbeke wiha pîs meriv xemsariyê nake: him ji bo xwe û him jî ji kesên der û dora xwe tiştê ji desta tê dike, guh dide temiyên hekîm û kesên zana.

Lê li tirkiyê ne milet tenê, siyasetmedar û zanayên wan ên dînî kûpê nezaniyê û cehaletê ne, lama jî di destpêkê bi cidîyet bala milet nekişandin û tedbîrên cidî negirtin.

Ev ne bes bû rastîya heyî veşartin, jimara kesên nexweş ketibûn û mirin rast negotin, dezînformasyon belav kirin.

Lê çira virekan heta sibê vêketî namîne, dawiya derewan hat û nuha her kes dibîne mesele pir cidî ye, mêranî û cesareta ji ber cahliyê şaş e, ewê bibe sebebê zayîatên hîn mezin.

Zinarê Xamo

Daha Fazla Göster

İlgili Makaleler

Başa dön tuşu
Kapalı