Kurdî

Hêrişê Viyana karê cerganê DAÎŞî yo

Paytextê Avusturya Viyana de vizêr şan 6 cayanê cîyayan de hêrişê terorî ameyî kerdene û netîce de 3 kesî merdî. Wezîrê Karanê Zereyî Nehammerî pare kerd ke hêrişkerî sempatîzanê DAÎŞî bîyî.

Vizêr paytextê Avusturya Viyana de nêzdîyê Sînagogî û Komelê Kulturî yê Îsraîlî de hêrişê hemdemî ameyî kerdene.

Polîsanê Viyana ewro serê sibayî eşkerayîyêke daye û pare kerd ke 3 kesî hetê hêrişkeran ra kişîyayî û polîsan hêrişkerêk kişt. Viyana de hêrişan ra dima rewşa îstîsnayîye ameye îlankerdene. Polîsan tay hêrişkerê bînî tepiştî. Hêriş de 15 kesî birîndar bîyî û rewşa 7 kesan giran a.

Wezîrê Karanê Zereyî Karl Nehammerî serê sibayî eşkerayîyêke daye û eşkera kerd ke polîsan eşt tay keyeyan ser û madeyê teqaberî vistî destî. Nehammerî da zanayene ke hêrişkerî sempatîzanê DAÎŞî bîyî.

Serekwezîr Sebastian Kurzî hêrişî ra dima medyaya dîjîtale ser o na eşkerayîye daye: ”Ma hêrişanê winasênan ra qet nêtersenê. Ma do têkoşînê xo yê vera terorî dewam bikerê.”

Yeno pawitene ke Kurz do nêmroje derheqê hêrişî de kombîyayîşê çapemenîye de zanayîşan bido.

Daha Fazla Göster

İlgili Makaleler

Başa dön tuşu